Hebel Johann Peter

Der Wegweiser

1.
Weisch wo der Weg zuem Mehlfaß isch,
zuem volle Faß? Im Morgenrot
mit Pflueg und Charscht durs Weizefeld,
bis Stern um Stern am Himmel stoht.

2.
Me hackt, so lang der Tag eim hilft,
me luegt nit um und bliibt nit stoh;
zletscht goht der Weg durs Schürretenn
in d'Chuchi, und do hemmer's jo

3.
Weisch, wo der Weg zuem Gulden isch?
Er goht de rote Chrüzere no;
und wer nit uf e Chrüzer luegt,
der wird zuem Gulde schwerli cho.

4.
Wo isch der Weg zuer Sunntigfreud?
Gang ohni Gfohr im Werchtig no
dur d'Werkstatt und durs Ackerfeld!
Der Sunntig wird scho selber cho.

5.
Am Samschtig isch er nümme wyt.
Was deckt er echt im Chörbli zue?
Denkwohl e Pfündli Fleisch in's Gmües,
's cha sii, ne Schöppli Wii derzue.

6.
Weisch, wo der Weg in d'Armet goht?
Lueg numme, wo Taffäre sin;
gang nit verbei, 's isch guete Wii,
's sind nagelneui Charte drin!

7.
Im letschte Wirtshuus hangt e Sack,
und wenn de furt gohsch, henk en a!
"Du alte Lump, wie stoht der nit
der Bettelsack so zierlich a!"

8.
Es isch e hölzene Becher drin;
gib achtig druf, verlier en nit,
und wenn de an e Wässerli chunnsch
und trinke magsch, se schöpf dermit!

9.
Wo isch der Weg zur Frid und Ehr,
der Weg zuem gueten Alter echt?
Grad fürsi goht's in Mäßigkeit
mit stillem Sinn in Pflicht und Recht.

10.
Und wenn de am e Chrüzweg stohsch
und nümme weisch, wos ane goht,
halt still und frog dy Gwisse zerscht,
's cha dütsch, gottlob, und folg sym Rot.

11.
Wo mag der Weg zuem Chilchhof sii?
Was frogsch no lang? Gang, wo de witt!
Zuem stille Grab im chüele Grund
füehrt jede Weg, und 's fehlt si nit.

12.
Doch wandle du in Gottisfurcht!
I root der, was i roote cha.
Sell Plätzli het e gheimi Tür,
und 's sin no Sachen ehne dra.