Groth Klaus

Matten Haas

Lütt Matten, de Haas,
de maak sik en Spaß,
he weer bi't Studeern,
dat Danzen to leer'n
un danz ganz alleen
op de achtersten Been.

Keem Reinke, de Voß,
un dach: Dat's en Kost !
Un seggt: "Lüttje Matten,
so flink op'e Padden ?
Un danzt hier alleen
op'e achtersten Been ?

Kumm, laat uns tosaam !
Ik kann as de Daam !
De Kreih, de speelt Fietel,
denn geiht dat canditel,
denn geiht dat mal schön
op de achtersten Been !"

Lütt Matten geev Poot.
De Voß beet em doot
un sett sik in'n Schatten,
verspies de lütt Matten:
De Kreih, de kreeg een
vun de achtersten Been.